„ვიზამ“ პირველ ქართულ ნეობანკთან, „სფეისთან“ პარტნიორობის შეთანხმება გააფორმა, რომელიც მიზნად ისახავს ციფრული გადახდების მზარდ სივრცეში ინოვაციური საბანკო პროდუქტების განვითარებას როგორც საქართველოში, ისე მის ფარგლებს გარეთ.
თბილისი, 2019 წლის 14 ნოემბერი. „ვიზა“, მსოფლიო ლიდერი ციფრულ გადახდებში, და „სფეისი“, პირველი სრულად ციფრული ბანკი საქართველოში, აცხადებენ, რომ ხელი მოაწერეს პარტნიორობის შეთანხმებას ინოვაციური საბანკო მომსახურებების ერთობლივად განვითარებასა და ახალ ლოკაციებზე ციფრული საბანკო მომსახურებების მიწოდების მიზნით.
„სფეისი“ არის თიბისი ბანკის მიერ დაფინანსებული სტარტაპი, რომელმაც ოპერირება 2018 წელს მხოლოდ სამი თანამშრომლით დაიწყო. ამჟამად კომპანიაში დასაქმებულია 70-ზე მეტი ადამიანი და მისი პორტფელი უკვე 160,000-ზე მეტ მომხმარებელს ითვლის. ბანკი ოპერირებს, როგორც ინოვაციური საბანკო ლაბორატორია, რომელმაც საქართველოში ფინანსური მომსახურებები ახლებურ ფორმატში წარმოგვიდგინა. ფინანსურ მომსახურებებში შედის ონლაინ საბანკო ანგარიშის გახსნა, მომხმარებელთა იდენტიფიკაციის - „იცნობდე შენს მომხმარებელს“ - დისტანციური მეთოდი, ელექტრო სკუტერებით ბარათის მიტანის საკურიერო მომსახურება და მობილური აპლიკაციით ყველა საბანკო მომსახურების მართვის შესაძლებლობა.
პარტნიორობის ფარგლებში, „ვიზა“ ითანამშრომლებს „სფეისთან“ ინოვაციური, მომხმარებელზე ორიენტირებული და უსაფრთხო საბანკო გადაწყვეტილებების ერთობლივად შემუშავებაზე. „ვიზა“ მხარს დაუჭერს „სფეისს“ სხვა ქვეყნებში, განსაკუთრებით, დსთს-სა და სამხრეთ-აღმოსავლეთ ევროპის ქვეყნებში გავრცელებაში.
ნიკოლოზ ქურდიანი, თიბისი ბანკის გენერალური დირექტორის მოადგილე: „სფეისს“ აქვს შესაძლებლობა მოახდინოს ყოველდღიური საბანკო პრაქტიკის ტრანსფორმაცია მისი გამარტივების და დახვეწის გზით. როცა გავუშვით „სფეისი“, ჩვენ გვინდოდა გავცდენოდით ტრადიციულ საბანკო მიდგომას და მოძველებულ ტექნოლოგიას საქართველოში ახალი ტიპის ბანკის შესაქმნელად, რომელიც უკეთ დააკმაყოფილებდა თანამედროვე მომხმარებლების საჭიროებებს. ახლა კი უკვე მზად ვართ ვიმოქმედოთ გლობალურად. ამიტომაც, ჩვენთვის კრიტიკულად მნიშვნელოვანია „ვიზასთან“ სტრატეგიული პარტნიორობა. „სფეისმა“ დაამტკიცა, რომ თავისი ინოვაციური და ამბიციური ხედვა რეალისტურია და რომ ის მზად არის უფრო დიდი მიზნების მისაღწევად“.
ევგენ ლისნიაკი, „ვიზას“ წამყვანი დირექტორი და სტრატეგიული პარტნიორობის ხელმძღვანელი (დსთ და სამხრეთ-აღმოსავლეთ ევროპა): „ჩვენ გვჯერა, რომ პარტნიორობის ფარგლებში ჩვენს მდიდარ გამოცდილებასა და ინოვაციურ გადაწყვეტილებებს გავუზიარებთ გადახდების სფეროში განვითარებად ისეთ მოთამაშეებს, როგორიცაა „სფეისი“. ჩვენი მიზანია, ფინტეკების ეკოსისტემის განვითარებისათვის ჩვენი ცოდნა, საუკეთესო გამოცდილება და ტექნოლოგიური პარტნიორების ქსელი გავუზიაროთ „სფეისს“ ციფრული ფინანსური მომსახურებების არეალის გაფართოვების მიზნით. დღეს, ჩვენ ვართ ფინანსური საბანკო სექტორის სწრაფი ტრანსფორმაციის მომსწრენი, სადაც ახალი მოთამაშეები მნიშვნელოვან როლს ასრულებენ. ნეობანკები მომხმარებელზე ორიენტირებულები, მოქნილები და ინოვაციურები არიან და თანამედროვე მომხმარებელს სრულიად ახლებურ ფინანსურ გადაწყვეტილებებს და ციფრულ საბანკო გამოცდილებას სთავაზობენ. მოხარულები ვართ, რომ შეგვიძლია დავეხმაროთ ფინტეკებს გადახდების სივრცის ნავიგაციაში კავკასიის რეგიონის მიმართულებით, მათი ბიზნესების განვითარებისა და საერთაშორისო ექსპანსიის ამბიციების განსახორციელებლად.“